Bagabaga

Torraun di meu

2010-10-25T21:22:00.004-01:00

Torraun di meu dia ki txuba beja-bu
Sorizu na rostu ta lumiá mas txeu
Mininus ta perde na mei di midju kressidu
Ta sgrovetá txon kada galinha pa se banda
Kantar de pardal na rotxa ta ser senal de rikeza
Ta ser un grande alívie p'ese pove markode pa tenpe

Morna nhas raiz ta finkode na bo seiva
N kriá dboxe di ternura de bos verse
N durmi enbaladu na bo melodia
Ku bo N ta falá ku tudu mundu
Sen bo mi e un muribundu sen ar
Bo e mensajen pa tude kretxeu na térra lonje
Bo e linguajen pa tude kriston kabverdiane

Ami e feliz ke N da nes txon
Ondê ke rikeza e forsa d'ome
Ami e feliz ke N da nes txon
Ondê ke tude ome devia ser irmon

(Daniel "Nhelas" Spencer Brito)

Badiu Si

2010-07-30T11:06:00.002-01:00

N bá pa kása nha kumádri
N bá pidi konsedju
Maridu dja sai á ta kámba Praia
Libóriu bo e ka brinkadera
Dja-u pánha kel báka
Ki-nu katrisa ku el
Désdi (Si) ki Grigóri nasi

Ki nu ta ganha nós pon (di dia)

Labánta sédu palmanhan
Ta bána kabésa
Ta pidi Nhordés
Pa djudâ-m ku bida
N mára nha suláda
N poi nha fidju na pontáda
Troxa na kabésa
Pa labuta bida

Nha kuskús dja fika sen leti,
Kufongu séku raganhádu
Mosinhus ka kré
Tánbi nha kapuera sen galinha
Óbu nen pa ramedi

(Kim Alves)

N ta kebróde nen Djosa

2010-06-04T11:30:00.004-01:00

Nha julbera ka ten un sênte
N ta kebróde nen Djoza
La na kaza moral ta boxe
N ta kebróde nen Djoza
Ja N mandá paródia pa stótxa
N ta kebróde nen Djoza
Ka un na se lugar
N ta kebróde nen Djoza

Mesme asin
La pa dia 10 a N ta inraskóde
Vida ta-m difisil
Ka ten matematika pa rezolvê

Gosturdia diabe intenta-m
N tá kebróde nen Djoza
N korê mon na koza de jente
N ta kebróde nen Djoza
N benzê N sei ta bai
N ta kebróde nen Djoza
Moda N lenbrá mi e kabverdiane
N ta kebróde nen Djoza

Oh, Zulmira
Ka bo infronta-m
Ja N ka pode mas

(Vlademir "Vlu" Ferreira)

Pila ku nha boi

2010-04-27T13:01:00.002-01:00

Iaiai N á ta pensa na kasa
N á ta zinga má ka teni koraji
Ui ui nhos leban Gudin
Pa N bá da Sakramentu
Pa N libra prufetas Praia

Di Figeral bu ta kodji bon figu
Fitxu’l kabra ta bá rotxa galopia
Di mamai bu ta ten má konpanhera
Kredu abrunusia Djuzus anti’l keda
Baka si rabu Deus ki ta bana

Nha boi, oh, nha boi
On nha boi pila ku nha boi
Ka ten konpasu, nha boi
Sen konpasu, nha boi

(Zeca & Zeze Nha Reinalda)

Puntin Puntin

2010-04-21T16:07:00.005-01:00

Es dze ma ken ta kontá un konte
Senpre el ta kressenta un ponte
P'un storia mi ja N tra ke dvera
Konde N uvil en ne sin kel era

Un vez Jonzona era motxe
El tava ten amdjer era pa kótxe
Ma oje na banhera de nha Ema
Es oiá (trá) kma el e motxe y féma

Puntin puntin ta kressenta
Kuste d'vida ja vrá ta matá
Ate ke já N korrê oje na Stancha
Ta pdi sabóla pa ptá na kanja

Tude koza gora ta mudode
Tude koza ta modernizode
Ate kel bidjinha de nha Jóva
Ti ta pintá pa vrá mas nóva

(Paulino Vieira)

Avenida Marjinal

2010-03-26T09:04:00.003-01:00

N'avenida marginal
Nun luar di madrugada
Uns ta brinká no Sotá
Otes ta brinká mae má pai
Oi k'sabura ta brinká na mei di kriola
Nun silensie di madrugada
T'uvi mar skebrá n'areia

V'nida marjinal é k'ta na moda
V'nida marjinal é k'ta morrê pêxe
Ô Djack, ben nese kalor di madrugada
Ben nese kalor nô ta pasá sábe

(Manel D'Novas)

Suzana

2010-03-23T15:32:00.003-01:00

Suzana branka
Suzana branka, bunita
Oji e di meu manhan e di bo
Nha bida sta bu mon
Si N mori bo ki mata-m

Suzana branka
Divagar k'e tenpu
Modi ka ten, ka konbersu
Djetu ka ten, ka rabesu
Sakedu kétu pa nu papia

Suzana branka
Puxin Barela fla-m pa N flo-u minina
Pa tardi midjor e sedu
Suguru mori di bedju
Konsedju el ki ten pa do-u

Suzana ka bu larga-m
Suzana ka bu mata-m
Suzana ka bu fronta-m
Má Suzana (branka) hmm

Minina branda, branda minina
Fladu ma Nhordéz fazi si mundu na séti dia
Má paxenxa... fla-m nou ka ta mata-m
Ma si dura ki fla-m go, ta magrise-m

Suzana branka
Kabelu finu na kabesa
Koxa rodondu na kantu kalsa
Sima bola na kanpu
Kusa sábi di djuga

Suzana branka
Bo e galinha mi e galu
N ta kanta na puleru
Sábi kume bu boka
Sábi piska ku odju

(Finaçon)

Oh mundu ka bu kaba

2010-03-23T11:16:00.004-01:00

N bá Txada Santantoni
Na kasa di nha Fróza
N odja kuzas d'otu mundu
La na mundu di nha Fróza

Mininu matxu, xemadu
Rapika pe na txon
Tora dama, fúmu fitxa na sala

Soris bazadu
Ferinhu tenpradu
Palmu rapikadu
Gentis djuntado ta grita ku tudu forsa

Oi mundu ka bu kába
Oi mundu ka bu kába

Ku spingarda, pistola, fogeton
Nha genti es krê kaba-nu ku mundu
Pô kamuga na fundu mala
Nha korpu sa ta due-m

Ku es probreza
Ku sês abuzu
Sês apartheid
Mersenáriu krê kaba-nu ku mundu

Nôs nu ka ta dexa
Nu ka ta dimiti, nu ka ta pirmiti
Nu ta djunta pa nu grita ku tudu forsa

O mundo ka bu kába
Pamodi N sta mutu nobu
Nha Fróza, Nha Fróza
Nha vinti skudu e ti manxi

Minina da-m bu sukri
Pa N ndoxa nha kafe
Mamai da-m bu petu
Pa N máma leti doxi

Manhanha laba linpu
Pamodi N ta kume tanbe
Minina da-m bu bala
Pa N poi nha pistola

(Bulimundu)

Moças di Mangui

2010-02-26T16:04:00.002-01:00

Kapadu gosi ka ta fladu
Sabidu di gósi ka ta inxinadu
Korpu ka runhu ka mal tadjadu
N ta odjabu la na rubera

Mosas di Mangi korpu linpu
Perna stikadu koxa rodondu
Kabelu pretu ben transadu
Fladu ma mama sta na petu

N staba ta pasaba na nha kaminhu
Nha genti N xinti gaita ta pupa
Era son finu di funaná
N fla nha genti keli e gaita nha kunpadri (di Eduino)

Sodadi Tarafal,
Sodadi Ponta Lagua,
Sodadi Txon Bon di Mangui
Sodadi ta mata-m
Sodadi Alfredo Carvalho
Sodadi 3 di Outubro
Sodadi Rubon Manel

(Ferro Gaita)

E Morna

2010-02-10T09:46:00.003-01:00

Ese sodade ki ta invadi-m nha peito, e morna
Ese vontade d’oiá rizonhe tude ese nôs pove, e morna
Tude alegria d’inkontrá un velho amigo, e morna
Tude kel ternura na olhar de un kriansa, e morna
Kel lua xeia ki ta invadi nos lar, e morna
Kel água azul, mar k’ta serká nôs téra, e morna
Kel morabeza inkontrode pa tude se kónte
Dakele lenbransa de ter konxide Kabe Verde
E ate un lagrima de ken ke ta sofre de amor, e morna

(Desconhecido/ Dudu Araujo)

Pidrin

2010-02-10T09:28:00.003-01:00

Ome e kel ke ka ta txa familia nen sangue perde
Ta po amdjer dent’na kaza, pa rása pode mante
Asin ta flaba mi nha avô Manel
Ma mi kuitadin, ten txeu tenpe ke N largá tera
Idade dja entra-m na korpe, se N ka dspatxâ n ka ta txgâ lâ

N rezolve skreve prime jon, ome de odje ragalode
Amdjer e ta konxe-s e so pa txer
Pa’l spia-m un kriatura pa’l manda-m se ratrote
Y se for boa pésa el pode markâ kazamente
Ka ten prublema N ta kâza

Ka pasa nen un mes mi Pidrin dja-m tá kazode
N ka pude stode la prezente má nha prime tá lá pa mi
Ta lenbro-m ma na vespra Djinha tá kantaba
Iá Pidrin oje e ke bon dia
Ningen ka dobe nose Senhor e k’dóbe
Oh, k’sabe

Un one y mei dpôs Pidrin txgá na téra
Primera koza ke el faze foi mandá btá un bói
(Atenção, atenção população de Jon Galeg)
Iá jente de Jon Galeg Pidrin manda flâ
Ma dja-l txgâ na téra, groge na se kaza ta avontade
(Pidrin dja txgâ!)
Flipa nha amdjer de fakte era lovar-a-deus
El matá 3 kapode pa resebe ses Anton Motxe
Y durante nhas 2 mês N mostra-l ken k’era mi

Dpos de voltá pa faina era tudu dia ta sperâ notisia
Mó n tinha kuaje serteza mó márka fkâ pa trás
Ka pasa nen 5 mez txgâ notisia m’era un rapaz
N fkâ taun kontente ke n fuzkâ n data de bês
Mó Pidrin ja e papá, Pidrin ten un rapaz

Na dia siginte N resebe karta de nha prime Jon
N po un Gin pa frente pó-m alê na susege
El fló-m, meu primo nossa raça e dzgrasóde
Má bo ka ta otxâ ma bo e lijer
Bo pai mandâ flobe mó graças a Deus
Bo ma bos irmon bibe leite de vaka a vontade
Ma kuaje e so na bo e ke marka djâ fkâ
Pa falâ verdadi mi n ka konprende
Mo mi n tava taun kontente
Mo Pidrin ja e papá, Pidrin ten un rapaz

(Tio Lino)

2010-02-10T09:16:00.003-01:00

Ku pena N pêga na pena
Pa nha pena N ben konta-bu
Ku mas pena N larga pena
Ku pena N ka podê odja-bu

(Pedro Cardoso)

Fogue na Olhar

2010-02-09T11:54:00.001-01:00

Na bo olhar un notá un fogue ta konsumi-be
E bôs lenbransa ke ta vive senpre ta konpanho-be
Má n ta dze-be mudá bo vida mudá
Pa bo pode konprende ken ke ta na bo lode

En vez de pensá ke munde e ke ten ke txgá na bo
Txgá na el mode bo ka e sentre dese universe
El e taun grande maior ki tude orgulhe mas grande
Má sen bô talvez el ka ta ezisti

Di vez en kuande sei di bo mese ou di bo konxa
Rekordá pode ser perde rume do ki na verdade e
Un fogue ta kabá k’ote fogue
Má inda ta restá sinza

(Vasco Martins)

Têris ka pexi pa xinti txeru

2010-02-05T15:53:00.003-01:00

Oi sedi ki n ka podi bebi
Djobe-m di pe sai kabesa
Mal tadjadu ka malkriadu
Xeiu di forsa pa n da-bu tudu kel ku kre

Oi sedi ki n ka podi bebi
Águ na boka kre disprinda garganton
Sprinda-m kel beju ke tudu nha dizeju
N ta sprindo-u monzada sábi ki ka ten mondon

Oh dja n ten idadi xinti sábi
Sábi ki sa ta mata-m, oi
Sábi ki sa ta gatia-m
Si sai konplikason nu tá poi nos kalderon

Teris ka pexi pa xinti txeru
Monzada sabi ka ten mondon
Jogu di luz dentu Pilon
Maria-m kabesa
N ka da pa si

Nha guenti N pila, N pila na Pilon
Nha guenti N pila, N pila na Ateia
Na Imasom, na Tropicana,
Na Sedicor, na Chacra
Na Avis, na Hi Step
Na Katen, na Je T'aime
Na Motorin, na Morabeza
Na pasaji d'anu nen si ben otu mininu

(Zeze di Nha Reinalda)

Inkondisional

2009-06-18T14:33:00.003-01:00

Si bô kre-m N kre-b
Si bô ka kre-m mesme asin
N kre-b simé
Bô e ke nha strela gia
Kretxeu d'nha pensar
Bô e kê nha razaun d'vivê

Já N krebo na nha pensamente
Di korason di korpe intêr
Ku tudu forsa di nha ser
Ben ser di meu ô d'ôt algen
Ka inporta-m se pa bô ben
Li na nha peite ô notro leite
Kriola bô é kê nha luz
Zelá pa bô felisidade
É tude nha razaun d'vivê

Nen si bô ka kre-m
Si bô ka kre-m mesme asin
N kreb feliz
Alimenta-m k'bô alegria
Sorizu di bô rosto
E k'ta da-m forsa
Pa N vivê

(Constantino Cardoso)

Sábi

2009-04-13T17:03:00.003-01:00

Maz sábi ki sábi
Sô sô sábi
Má maz sábi ki sô sábi
Sô poi sábi

N Sunhá

2009-02-06T09:55:00.002-01:00

N sunhá k'bo
Nha téra kretxeu
No ta ta ben d'mon dóde
Oi na séu
Pa strada fora d'Liberdade

Skeside tude nôs péna
Maróde na nôs sertéza
Ta kantá feliz un koladera
Mi ma bô nha kretxeu
Lode a lode, mon na mon
Oi finkode na séu
Na séu azul d'nôs future
Feliz da vida
Pa strada fora d'Liberdade

(Amílcar Spencer Lopes)

FRI (FREE) SON

2008-07-31T15:09:00.001-01:00

FinaSon sen fin
pó raiz di lonji
voz di konfin
éku ki ben ti oji
roladu na mundu
y na tempu ku Son
na tereru batuku
txabetadu na txon
ah Kabuverdianu
gaita ku ferinhu
Son ki ta gatianu
grandi ku mininu
mi ê Son serenata
nkunhadu na tenpu
bibu madrugada
ta bolokia na ventu

(Djinho & Kaka Barbosa)

Dexa-m kai

2008-07-31T14:57:00.004-01:00

Ta kai
sima un folha
onradu pa ragáz di bu koraSon

Nha kéda
ê ntréga di alma
sen médu

Nha kéda
s´ta brasadu pa luz
muzika

Dexa-m kai…

N´krê sabi si amor
ten un kódigo
na marjen di riu di vida

(Djinho Barbosa)

Ponciana

2008-07-22T15:47:00.002-01:00

Ponciana, Ponciana,
Ka bu fla
Mo sta gravida di Chanate Kaboker
Ponciana, rapariga parsidinha
Ami N kria-bu ku agu di nha bóka
Avontadi ben trajade ku tudu mimu
Pa ben kasabu
Ku emigranti di Olanda

Nha Kunpadri onti stába li na káza
Trazê rekadu K'Antonin
Si fidje manda d'Olanda
Ma na mês di Agosto al sa ta bem di féria
Si Deus kizer al sa ta ben kazá ku bô

(Tibau Tavares)

Fernanda Karakunda

2008-07-22T15:34:00.002-01:00

Fernanda Karacunda
Bô é trabalhadera
Trabalha nôte y dia
Sustentá bô irmá
Pa makóke kmê na mónse

Mãe el e fidje d'nha Bibinha
Ma tanbê el e irmá
d'Fernanda Karacunda

Oi nha fidje oh k'azar
k'bo tive pa nassê
Bô mae e karacunda
Bô pai ta trá k'un perna
Bo ta morá nun kazinha de tanbor

Un golpáda d'kafê
Kafê pa tude jente
Konde kafê kaí na perna
El txorá se kafê ke sertéza

(Alcindo Manuel Dias)

Kriolu

2008-05-26T11:06:00.001-01:00

Instrumentu kultural
Karta pastoral
Di "Cabo Verde" dignidadi
Di nos tudu identidadi
Na Kriolu ta nodjadu
Namora, lingua kretxeu, Kriolu
Miolu filozofia popular
Alma-l morna
Gritu funana
Txon di batuku
Dj'es kre-bu (Elite) ma ka ta valoriza-bu
Ta xinti-bu ma ka ta papia-bu
"Portuges" studadu
E p'el papiadu
"Comme il faut"
Interesanti gó
Tó k'es papia "Lingua Camões"
Uns pa bazofaria, otus pa mania
Ta rabida sin es ta bira-l na bo
Dizafrónta
Pa ka da "barraca"
Dizafrónta
Na koba algen
Na namora sabi
Na papia n'oredja
Na txora kretxeu
Na óra di bai
Na nodja finadu
Ku kapa ("K") es ta ratxa denti
Kapa ("K") e Afrikanu
Es ka sabe gó
Ma kapa ("K")
E linguistiku
Tanbé Afrikanu
Suma e "Ingles" ó "Norueges"
"Apolojistas" bu ten pa dimáz
Pa riba-l tudu na teoria
"Ateistas" gó na prátika
Te pa sobra
Na Greja Nhor-Des ka ta kudi-u
Na skóla bo é ka ofisial
Na sala vizita bo é di kuzinha
Ken ki ta difende-bu
"Más papista ki própi papa"
Te kexa dja kexadu dja
Radikalistas sta po-bu na stronu
Bo é lingua ka dialetu
Bu variantis é bu rikeza
Santantonensi di "Kukuli"
Pertinenti, sin
Sima Santiagensi di "Robon Manel"
Ninhun ka ta prejudika
Di kontráriu ta konplimenta
Lingua Nasional, padron d'unidadi
Ka ten kalé - Barlaventu ó Sotaventu
Di Djabraba pa Santanton
E bo k'é di nós
"Papiamentu" di povu
Kriolu di Kabuverdi.

(Manuel da Luz Gonçalves)

Karta de amor 2

2008-05-21T16:12:00.001-01:00

Ex.ma Menina Ines Maria da Graça
Vulgo Nizinha

V. Ex.ª marrou um amor cim que trepadêra liade na pé de mate de jardim despôs de tante sufrimente que nôs dôs sufreu nesse qrimente que tira que dexa devide faltava coraja pa decidir um só palavra cum vergonha de nada cosa nem estrecóla de má quèrência. Ainda bem que teve quel nosse goste impruibide aonde nos garrochou noces curação tê tomar folga dum naotro que deu na fraquesia du amor. Peça adesculpa de meu brutlindade. Nizinha oje india na data doje meu sone é debaxe das afronta depezadel sempre com V. Ex.ª carecende ajuda num afronta que já fique esterlotade palavra donra de cidadão que nem ê mestor nem gosta de flistria.
Gente de casa já deu fé e já descobriu que estou ficando cimprade noalhei dos mandade de fazenda é mesma verdade queles diz de mim é esmerece cem tine de cosa nenhuma desque nos cumprumeteu naquel juramente empiedoze nome dissuz Nizinha precisa um aparte mas garnde de conversa pa nôs resolver destine na planeta questá nentrada dazágua na dia de sam Jõ baptista.
que manda despresa oje mesma pla portador recumendação e mute amor até cande Dês quezer

do seu cavalher

Josè Perpétua dacruz

Foi mantidu skrita orijinal di livro di Luis Romano

A volta

2008-05-08T15:59:00.001-01:00

Sin, el á d'voltá.
Y kzê k’ N á dzê?
Kma N spera-l?
Kma N sofrê?

S'el ka kreditá?
Kzê k' N á fazê?
N á mostra-l fidje,
ô N á fká kalóde?

Y s'el ben el stranhá kaza;
ese nha magréza;
ese portôn abêrte,
ese lume pagóde?

Y s'es tude ben dá sêrte?
S'el kabá d'entrá
el korrê pa min?
N á pô ta txorá,
ô N á pô ta rí?...

(Sérgio Frusoni)

Pai d'Fidje

2008-05-08T15:35:00.002-01:00

Spiá pa fidje, ken? El? Adé!
inporta-l lá s'ês t'andá sfarrapóde,
ô sen kmê! Alá'l sentóde
na jôge, êse ê ke'l krê!...

Skompôl? Brigá ma êl? kónta d'náda!
Remêde ê rezá, kmáde!
Y pdí Nossiôr pa faze-l ganhá,
pamóde s'êl perdê, êl t'íntxóme de pankáda...

(Sérgio Frusoni)

Rakaída

2008-05-08T15:19:00.001-01:00

Ka nhóz txôman Badiu
Ka nhôz flan Sanpadjudu
Ka nhôz fazi más briu
Nhôz stâ mutu bokudu

Anóz ê kabuverdianu
Di li nhôz kâ tâ tranu
Antan ka mesti gera
Nóz tudu ê fidju tera

Nu kâ branku sigunda
Nu kâ buru karétu
Ês kuza ten ki muda
Nu ten ki tral di pétu

Nu luta sen vaidadi
Pa nóz dignidadi
Pa frenti sen maldadi
Ki stâ filicidadi

Si tera kâ ten oru
Ka mesti dizaforu
Nen ka nu spera djuntu
Pâ sapatu'l difuntu

Si bidion ê kâ péxi
Nu méxi nu raméxi
Albérka kâ sapátu
Bida kâ stâ barátu

Finadu mal nterádu
Firida mal kurádu
Difuntu mal karsádu
Djâ dâ pésti rakaída

(Alberto Alves "Neves")

Padaz di "Lusíadas" na kriolu

2008-05-08T15:04:00.006-01:00

Depôs que nô passa quês lá de Canára
Q’otr’ora ês tá dá nome de Furt’náde,
Nô ’ntrá tá navegá lá pa quês aga
D’aquês la de Cabe-Vérd’ tam sabe,
Quês têrra onde mute maravia nove
Nosse navi de guêrra j’andá t’oiá:
Lá nô ribá c’um vintim favoróve
Pa nô t’mésse na quês têrra mantmete.

Nôs antrá na pôrte d’um d’a quês [ilha]
Que t’má nóme d’aquêll guerrente Sam Thiágue,
Sânte q’ ajdá mute naçom spanhól
Fazê n’aquês gente môr mute strágue.
D’êi, q’ande soprá um ventin de Nôrte,
Nô torná t’ma noss’camim socégáde
Na mêi d’aquêll már, e assim nô bá d’xánde
Quêll terra, onde nô ocha refrésque sabe.

(Luís de Camões)

Traduzidu na kriolu Santanton pa Kónego A. da Costa Gomes, Maiu di 1898

Quel degrau de scada I

2008-03-31T16:48:00.003-01:00

Sr. Presidente de Cambra

Eu venho dizer você come na porta de meu casa tem um degrau de scada que não tem condição de gente pôr pé. Se você quer saber onde eu mora, você vai na rua de Nha Rosa das Seca, você sobe naquêl muntim que sta na fim de rua, você pergunta quês gente que mora lá, pamode eu sou uma senhora de posição que tude gente conhece. Eu sei como você ê um home que tem juize na cabeça, e por isso você manda ranjar quel degrau de scada de sacada para eu não quebrar meu nariz naquel degrau de scada.
Deus defenda se eu vai ter prigo naquel degrau de scada! Eu sou pessoa pra dar você um rabencada de pedra na fio de canela. Você não pensa que eu tem medo de você. Eu não tem medo de você, nem de nenhum gente de Cambra. Se eu quebrar meu nariz naquel degrau de scada, você não passa sabe com eu; se você não sabe quem eu é, você pergunta tude gente de Sanvecente. Eu sou um senhora fina, graças a Deus, mas tambem eu sabe ser desaforada pra quem pisa meu cale. Vocês não sabe pensar, naquel Cambra de nô sê que diga! Se eu não era um senhora que tem iducação, eu mandava vocês tude pra bardamerda.
Vocês quer é boa vidinha na Baía das Gaitas, mas era melhor se vocês mandava ranjar degrau de scada de cada um.
Você disculpa, mas é assim que eu é. Eu fala clare tudo quanto eu pensa na meu coraçom. Se vocês não manda ranjar quel degrau de scada depressa, eu pede praga e meu praga velha pega.
Vocês tem fazide só asnera nês terra de porcaria; morada stá intupide de tude casta de porcaria que chuva trazeu, pamode vocês acabou com riguim. Tude merda que vinha de fora corria na riguim e calçada de rua ficava limpe. E você sabe come tude gente vai baxar trás de casa de gente, pamode pliça já acabou na Sanvecente. Se vocês tinha olho na cara, vocês via come tude stá largade na pôc respeite. Agora só falta gente fazer asnera na meie de rua. Desafor!
Vocês sta dar mandrongue mais consideração que gente de nôs terra, pamode vocês stá intepide de medo duns pliça de Lisboa qu’els chama Pide. Sanvecente já acabou na nada! N’aquês tempe antigue tude cosa era fazide nas direita. Mas agora, tude gente grande, de posição, stá desnortiada. Até senhor Governador, hôme de grande posição, que tem seu peite renquiode de midalha, moda rei de nôs terra, já desnortiou tambê. Els disse como senhor Governador ê nôs pai, mas ê um pai que não vale a pena. Els disse como senhor Governador mandou trazer uns português de Lisboa pra trabalhar na strada das ilha, mas tude pove disse come quês português que veio de Lisboa ê um casta de gente que só quer encher barriga, pamode chuva stá stragar tude strada quês tem fazide. Els disse eu tambem que seu governador btou discurse na ilha de Fogo aonde el disse como quês português tem curso de strada, e se chuva levou strada pa mar, els não tem culpa pamode chuva foi muite forte. Mas agora el manda ramendar tude pra ficar uma coisa más forte. (Ma pêl bem de céu) Els disse eu come tude pove de Santantão stá muite gravode, pamode quês português que tem curso de strada tem gastode dinher cma area naquel terra mas gente ainda não viu resultade de benefíce. Eu recebi um carta de Santantão aonde els manda dizer eu como quês português sta stragar um porrada de conte de reis pa fazê um escola fina que até gente faz sirvice pxada pa linha.
Senhor Governador disse come Lisboa ê que manda dinher, mas el não disse come Lisboa que manda quês português pra vir levar quel dinher trovês. Que Deus manda chuva pra els ver rasultode de seu service. Se senhor Governador tinha vergonha na cara, el mandava racambiar tude quês português de Lisboa. Se ês cria bem de nôs terra, ês mandava quel data de dinher, sem português de Lisboa, e gente das ilha trofegava nele. Nhô Manel Damechó disse come quês dotor d’hospital disse come senhor Governador stava tacode dum doença muite perigosa quê chamada doença técnica. Senhor Governador mandou chamar senhor Dr. Fonseca para fazer ele operação, mas senhor dotor Fonseca disse come el não põe faca pamode não sabe se quel doença stá na cabeça ou na barriga. Boca de pove disse como senhor Governador stá pegar mute gente quel doença.
Senhor Presidente, você toma muite cuidade com o seu engenher de Cambra pamode el não conhece pobréza de nôs terra e sta tacode de mesma doença que senhor Governador. Mesme quel conhece pobréza de nôs terra, el só vai stratar de riqueza de seu gilbera. Ele vai ric pra Lisboa e deixa você na mau posição.
Nunca português de Lisboa ranjou tante nota na nôs terra cma agora! Agora que estou a ver pamode quês gente de Angola tem quês português tromentode. Senhor Salazar, quel quê Rei de Lisboa, disse come tude português que vai pra terra d’África vai pra ensinar amor na nome de Cristo. Mas ê mentira, pamode se els ia na nome de Cristo, desde quel tempe antigue atê hoj-im-dia, ês tude, branco e prete, já era irmão; stava tude na mesma camada.
Els disse eu como senhor Governador vai mandar um tal senhor Bento Levy pra Lisboa aonde ele vai sirvir de recador de gente das ilha, mas el vai ê defender seus asnera diante de um tal senhor Salazar que ê Rei de Lisboa. Pove das ilha não queria senhor Bento pra recador, el queria era senhor engenher Fonseca, mas senhor Governador disse come sr engenher Fonseca não pôde sirvir pamode el fala muite clare. Ele só quer na Lisboa ê gente mude que não pode falar o qu’ele pensa na seu coraçom. Nhô padre disse, diante de eu, come senhor Bento stá falar mentira, pamode el não podia benzer judeu pesode, quanto mais judeu leve.
Você pode dizer senhor Governador come sou pessoa pra ler tude seu cartilha. Eu sei come els mandou vir pliça de Lisboa pra vir spreitar gente das ilha mas eu não tenho mede de pliça de Lisboa, nem de senhor Governador, nem de senhor Rei de Lisboa. Eu só tem mede de Deus na Ceu. Até els disse como senhor Governador tambê era pliça, mas na fim ês ê que fica tude pliçode. Se quês português de strada panhava gente de Santantão daquês tempe antigue, eles panhava de pau bem dade, mas, agora, gente das ilha ê uns coitode que não tem liberdade nem pra dar de pau. Mas tude fica entregode na conta de Deus.
Senhor Presidente, você não squeça daquel degrau de scada. Eu não tem más nada para dizer você. Esturdia panhei um topada naquel degrau de scada, eu ficou com um pé molestrade, nem fui pra sirvice da tarde. Você pode perguntar senhor Serafim.
Ali vai mantenha pa tude gente de Cambra, grande e piquenim, e vai galopê pa senhor engenher.

(Nho Djunga)

Once upon a time...

2008-03-31T16:19:00.004-01:00

Once upon a time in America
a little kriansinha was penduration
na burdirinha of a window
and gritation to the multidation

Help, help
N ta kei d'ei

The window was very froke
and bruke, el kei na txon
The policeman,
took the kriansinha to the hospital
and the doctor said

El ten kózta kebróde

(Popular - Sonsente)

Dia di Mudjer Krióla

2008-03-27T09:08:00.005-01:00

Un post antigu sobri Dia di Mudjer Krióla - 27 di Marsu.

Rasta

2008-03-26T08:52:00.005-01:00

Abo e un rasta
ki ka ten pasta
ki ka ten masa
ki nega rasa

Abo e un rasta
ao Deus-dará
ki ta konfundi
Djo ku Jah

Bu sta xeiu di stravagansia
Ta kre pása pexi pa karni
Ta kre iludi fidju-parida
Fidju di pai lárga si môs
Djobe-u pô ser si pai-di-fidju

Koperanti bira ta pula
Ka sta ku sorti, ka ten pa xula
Por isu, kabu sta maz ki mal
Bu ten kabelu, kela ka rasta
Falto-u raiz pa bu ser rasta

(Bulimundo)

Xubenga

2008-02-28T11:36:00.003-01:00

N papia ku xubenga di meu
N da xubenga di meu konsedju
N fla-l ma mundu d'oxi
E pa anda so ku odju abertu
Xubenga di meu meti pô n'obidu
Munta buru moku
E ba kori si bentura

Mama e nha kulpa e nha distinu
E lagartu fonti ki fla-m
Ma dj’e kre-m dj’e gosta di mi
Me ta fase-m rainha si palasiu
Me ta ba stima-m sima baka si kural
Ka pa tchikra ka p'ordinha
So pa N pupa’l anti manxi

Kantu disizu txiga na mi
Ki kunbosa ruma na mi
Ami Xubenga medu géra N ka ten
Kudadu bá txon ki ta da-m
Ami nha kurva sta fraku
N toma kafe so ku fidjós
Mi medu géra N ka ten
Kudadu bá txon ki ta da-m

(Neusalina Correia)

Groge

2008-02-28T10:54:00.004-01:00

Flode ku ma dia 15 groge ti ta ben kabá
A N ben fazê nha kolke
Pa N ben leva-l e tude ta bibe-l
Koraja kope koraja garafa
Bôka de Luís Kabel ta ptita-l e sô aguardente

Kuande N sei na Ilha d’Madera
Ku nha garganta má nha violaun
N bá pa kaza de Maria Leitera
N inkontrá Kakoi má Ninaja
N mandá ben un kuartin d’groge
Kónde Kakoi kris era katxupa
Ninaja kria era tusin
Luis Kabel kria era sô se groge

Maria Leitera e bôa pesoa
Ka (ta) xetiá pa nada dês munde
El po kel groge, kel katxupa ma kel tusin
Kakói koré na katxupa
Y Nenaja koré na tusin
Luis Cabel koré na se groge
Porkê groge e metade d’un ôme
Mas groge e metade d’un ôme
E pa ken e k’sabé bibe-l
Ken e ka sabé bibe-l
Panhá groge larga-l da mon
Txá groge pa três rapaz
Luis Kabel, Kakói y Nenaja

Ô groge ka bô matá kabverdiane
Ô groge ka bô matá nôs nen nada

(Luis Kabel & Kakoi)

Karta de Amor 1

2008-02-28T10:31:00.005-01:00

Ribeira Alta 7 doitubre de 1940

Ex. ma menina Fidjinha
Sosmente duas linha para voçamussê não carimbar du ingarte seu futurio cumpermetide que inda estou que çang sarrenhode pur varia daquele pegada du amor que voçamussê prantou na tal lugar du meu corpe.
Inda lembre daquel desimparim na casa denha Zabel que foi crefiticade du batismad e noçe centimentes comparode desde quelacasiãu deboxe de serca na funtinha aonde nos deu pur bem u primeiru encontre duamor perfeite com ajuda dualticimu eu tenhe que levar V. Exa. Paficar dejunte de mim pacempre eamém.
Nas altura queu vender minha pretençõ de mandioca queu vai bescar vçe com cara levantade i Deus na frente purque sou ome onrade i na trate de tude gente aqui nas banda da somada.
Com muita sodade i beiju i abraçe du eu fial até amorte com fé em Deus iamor

António Jusefina Forte
(vulgo toi)

Foi mantidu skrita orijinal di livro di Luis Romano

Kudadu 2

2006-01-04T17:03:00.000-01:00

Bu rostu e mansu
sima mar di lagoa
Bu surizu e largu
sima mudjer boa

Bu korpu e kurva
di nha tentason
Oh, dóxi y rudondu e bu bexu
ki ta tra-m pe di txon

(Djuntamon Afrikanu)

Kudadu 1

2005-10-10T14:50:00.000-01:00

Kre-u e oxijeni na nha petu,
timenti el e muzika sábi na bu obidu.
Obi, bu kalanta bida n'es nha uibu spasarode
di un katxor viralata na lua, pa bô.

(Djuntamon Afrikanu)

Batuke

2005-08-10T13:31:00.000-01:00

Nho Duque, Marquês de Pombal,
Pé na txon, kabél na kabesa,
Sori grása, denti na boka,
Ára kéda, mó na dinhêru,
Nho dâ-m fi de kabél di nhó,
Pâ N manda nkantada Lisboa !
Nho Duque, Marquês de Pombâl!
Tâ sonbra baxu pê di sabola,
Tâ dêta baxu pê di dinhêro:
Ki dâ-m ôro na kalman,
Ki dâ-m koráz na balâi !
Nho Duque, Marquês de Pombâl !
Faca tchitcha, ponta margura,
Bainha kuato minina nóba:
Tchitcha Nha Maian
Ku nha Má Sameda;
Nha Bódja Korêa
Ko Xinxum d’Almeda,
Pretas djarason di branku !

(de Pedro Cardoso)

Sirê

2005-07-27T09:25:00.002-01:00

Pastor di Kabra dedu bedju
Nariz di sonbra koku matxu
Kanela sima Saitu Lugar
Kô da-m ku lumi mufinesa

Bida, bida, kô pokenta-m
Kô da-m transtorno na nha bida
Ferver di korpu ka ta kenta-m
Da otu boita na bu bida

Ingratu e ka sô mi
Kalor di korpu N ten tanbé
Tenperatura sta normal
Normal, normal... normal

Buro e sima Nhu Ntoni
Ta kunpra boi ta bendi baka
Ku papelon pa ser jornal
Ta lenbi dedu sô sirê

Sirê e sabi e sabi
E sabi e sabi
Nhu Ntoni
Sirê e sabi e sabi

(de Orlando Pantera)

Nha testamentu

2005-07-27T09:18:00.000-01:00

Nha korpo e di txon nh'alma e di Deus
Vida e di meu korason e pa bo
Pasadu N ka sksel prezente N ta vive-l
Ftur N ka konxe-l pensamente e so bô

Tras d'orizonte foi sonhe sonhóde
Margura d'vida pô-me pe na txon
Mi nha busula ta enkravode
Mi nha sina nasse ma mi

Sima txeia na ribera
N ka ta kei na mesme asnera
N krê sabura d'un kantadera
N'un serenata sen janela

Sen tristeza pa nha bera
N'un grandi noite di lua xeia
N ta txá munde k'se kansera
Bo ta dó-me bo ragóse ke pa nha seia

Na dispidida N ka krê margura
Nen sodade d'un vida sonhode
N krê ligria dun vida vivide
Enbalode n'ondaz di dstine

(de Ildo Lobo)

Porton di nos ilha

2005-07-22T08:46:00.001-01:00

Kuande un mundo novo kunki
Na porton di nos ilha
Pamode ken fogon sen paia
Na ladera sen sinbron
Tude máin xei d’fidje sen stória

Tude grile kebrá se pedra
Pamode manhan ka ten prutxida
Y no kemá morabeza
Ma distinu tristi d’ilheu
Y no spaiá ses puntinha
Nun pratu funde sen fture
Di tudu ben sirbidu ki kriás

Y no kruzá un enxada
Ma un bróka y no spaiá
Un nôve ideia na nos mar
Sol y morabeza pa tude gente

Tude nos farol di morti
Simitériu di nos água
No vra tera pa tude jente
Lei, tude kriston, tude sinbron,
Ten direite na sê gota d’ága

(Renato Cardoso)

Téra bô sabê

2005-07-22T08:44:00.001-01:00

Téra bô sabê
K’e mistide un x tonte
Pa kada Ome vivé sima jent

Ma nhas brose o téra
Ta bituode ta batê
Rije, sek y fróke
Sima karise na sementera de jent
Pa d’pos N ben fka
K’nhas mon na féria
Na mizéria de un txuba ki ka ben
Ô tanbor baziu
N’abuze de partilha ma renda
D’aquês ki ka trabaiá

Ónes de inprensa d’stranjer
Sen raforma nen pensaun
Duensa na roséga,
Liberian, Grege, Olanda
Fidje sen skola
Amdjer largode
Nun vida dure
Di fazê dnher pa otes gordá

Ma nos mar e péska
E nos peska e martírie
Di luarada na mar
Bote, brose y linha
Un pexe y mei pa kada un
K’fidje na kasa

(de Renato Cardoso)

Apokalipse

2005-07-18T09:04:00.001-01:00

Paké tonte maldade nese munde
S'nô ta li sô pa un segunde
Paké tonte inamizadi
Pa jerá infelisidadi
Paké tonte ingustia d'géra
S'nô podê kriá paz na téra
Mdjor ê pensá
Ome ta xei di malvadeza
Sen respeite pa natureza
O Deus vale-m

Tonte invent na planeta
Tonte kuitode pa maneta
Sen ses ora txegá
Monopol de un kambada
E destine di nôs vida
Kada ora un notisia
Kada minute un malisia
Dezarmamente e konversa
Pa banquete e vise versa
É fortuna nun ponta
É mizéria note ponta
Munde ta pior k’un joge d'boka
Ka bô manda-m kala boka
N ta dzé verdade
No tita vivê d'boxe d'amiasa
Nun flagele pa tude rása
Munde podia ser ote kosa
Vida podia ser kor d'roza
Si nôs tude podia juntá mon
Ku Deus y amor na korason
Ma biblia ta fla Apokalipse

(de Manel D'Novas)

Naviu Navegá

2005-06-06T15:36:00.002-01:00

Na kada strela ten un sonhe
K'ta brilhá na note
Kome tude strela e diferente
Nos sonhe tanben e

Na kada jeste ten un prokura
K’ta kontinuá pa vida.
Kome tude jeste é diferente
Ese prokura, tanben e

Talvês, un dia
Nalgun porte ês ta txegá
Navegá, naviu, navegá
Bô ta levône pa lonje
Pa longe d’nôs mese
Atê no inkontrá
Algun fórsa deskonheside,

Y lá na funde di nôs alma
Nos korason ta sei ta vuá.
E ma ês un vontade
D´ser senpre un ave
Liberte d’tude paixaun.

El ta vuá, el ta vuá
Pa prokurá u k’ta eskondide
Na kada jeste, kada sonhe
Y asin unís na diferensa

(Vasco Martins)

Forsa di kretxeu

2005-06-06T15:27:00.000-01:00

Ka ten nada nes bida
Mas grandi ki amor
Si Deuz ka ten midida
Amor inda e maior

Amor inda e maior
Maior ki mar ki séu
Ma entri tudu kretxeu
Di meu inda e maior

Oh forsa di kretxeu
Abri-m nha asa em flor
Pa N bai alkansa seu
Pa N bai pidi simenti

Pa N bai pidi simenti
Di amor kuma es di meu
Pa N ben da tudu djenti
Pa tudu ben konxê seu

Kretxeu mas sábi e kel k’e di meu
E kel k’e txabi ki abri-m nha seu
Kretxeu mas sábi e kel ki kre-m
Ah si N perde-l morti dja bem

(de Eugénio Tavares)

Ora bon dia

2005-02-14T11:58:00.000-01:00

Ora bom dia, pâpia ku mi
Lenbra rasposta ku fika di da-n
Mára bu pánu bu ránja ku mi
Abô e txabeta y ami e rapikadu

(Orlando Pantera)

Téra mufinu

2005-02-04T15:07:00.000-01:00

Téra mufinu
Kultura na kobon
Lus, nen fumu
Kifari fogon

(Djuntamo Afrikanu)

Dja bu pasa vinti y kuatu anu?

2005-01-27T15:48:00.000-01:00

Sin! Anton sukuta un kusa

Tenpu ai ta pasa y, trando Malaika ku Ester, nos tudu sta bira bedju. Bu podi txiga kel konkluson li di un manera muto sinplis, e so bu pára bu pensa un koxi. Ka bu spanta si N flou ma miniz ki kaba 12º ano pasadu y ki dja bai kurso es nasi na 1984 kando bo dja bu sabé andá, lê, skrêbi y dja bu kumesába na kunfiadesa di Trouxeste as karta, Kazamentu inglêz, Verdadi ô konsekuênsia? - konsekuênsia e klaru.

Si bu djobi dretu Atari ka ta ejisti pa es. Es ka djuga na ZX Spectrum 48K ligadu na tilivizon, ta espera mas di sinku minuto ta odja monti di koris ta troka na TV, ta reza pa djogu entra, pamodi sinou e otu 5 minutu ta espera. Es ka djuga Gami di bolsu ki ta poi pilha di liroxi, ki kel omi fla m’e djuga ti ki seka pilha. Ti oxi es ka sabi kuze k’e kalsa Sanju ô Kulukutu ki fari Sandália Socal. Ti oxi es ka bisti kalsa ganga di Morabeza nen di Bonbazine. Es ka koba txon 3 bez pa djuga Karanbola (primera, sigunda, tersera, mats), es ka trokola pe na ora fulha, es ka da Kurubati (...ma kurubati e fixu ) Es ka espera tenpu txuba pa fazi korida di barku ainda ki seja ku pô di fôz ô biata di sigaru. Es ka anda tudu bera di calçada simentado ta djobi pista pa djuga Meta nen es ka pidi ilastiku na Banku pa poi na karu pa ka pasa ponta. Kel memu ilastiku ki ta sirbiba tanbé pa poi na Fletxa pá kasaba txota ku lagartixa. Es ka pidi Araminhu na kureio (ex CTT) pa poi na kel arami mopidu ki bu ta pidiba na oficina, o ki si bu tinha mas sorti bu ta atxaba na txon. Es ka rinka po seku di Baboza pa fazi spada nen es ka bebi Xalalá. Es ka sabi kuze k’e Freskinha 3 kor nen si tenba Djarama. Es ka dadu papa (UNI)CEF ki ta tomada nen s’e pa fazi kamoka. Es ka finji duenti sô pa dadu bolaxa Tuc ku Carnivali. Malta ku Compal di pera nunka foi sis bibida preferido. Es ka pasa un tardi ta ri ku Bud Spencer y Trinitá. Es ka txora lebado Filmi indiano pa torna bá txora tó ki Ravi (Amitah Bachchan) ta móri. Es ka kumpra dosi na tabulero di Xunpinha. Es ka brinka “Tubarão não mi pega, ki pega sô baleia” na prasinha skola grandi. Es ka kumpra Régua di madera nen Kaderno di Firestone (bu ka ta kerdita si N flou ma ti inda e ta bendedu). Es ka bai skola ku Kapa Amilcar Cabral. Es ka leba papel igieniku pa skola pa brinka “À malha” nen es ka dikora nomis di kau, di fruta y di sidadi pa brinka “Nomis Nomis”. Ka das medu bai splikason na D. Ivete. Es ka pidi kolega Frazi pa redason (A vaca é um animal doméstico. A vaca dá leite. Com o leite fazemos...) nen es ka fronta dia di prezenta Trabalhos manuais pistadu ki dja aprezentada monti di bez (Sim Prussora, eu é que fiz o trabalho...). Nunka ka das prazer Kolesiona Lata baziu di tudu tipo sikre katadu na sentina “Nhu Dimingo”, nen es ka pegado ta rinka Tanpinha di karu genti.

Parse-m m’es ka bai porta di bar ku splanada káta Pratinha pa fazi timi futebol. Es ka kori traz di Kromus di Zico ku Maradona. Es ka diskuti kenha k’e Nene, Jordon ku Gomes na djuga bola. Es ka tilifona pa kaza sis amigo so ku 3 numero (di nha caza era 524). Es ka odja novela na Sr. Hilário (Dona Xepa; Cabocla; Água Viva; Olhai os Lirios do Campo) ki fari Topo Giggio (... topo giggio é um rato tão...) ku Viva o Gordo (E aproveite que eu tô calmo...)

Es ka sabi pamodi ki Sucupira ten kel nomi lá, nen es ka sabi ken k’e Lindus Mérias (boxeru famado). Es ka konxi Boboxi na Tabanka Varzia Conpanhia nen es ka kori traz di (Tó) Charlô ku Nha Punotxa. Nunka es foi Pioneru (Eu sou pioneiro...). Es ka odja Tchopa Cool na Todo Mundo Canta (Pikiniki na Santiago dja bira un brinkadera... ben, kes mininas cool ku ses saínha cool, ses kabelinho ben penteadu...) Es ka obi Katchas ta sola, es ka konxi Boney M. Es ka sabi ma “Gelados pica-pau é uma maravilha”.

Nunka es imita mota tranzito p’es fla m’es e Djangu. Es ka ta sai na rua mo dodu o ki prisidentis de otu kou ta ben (es ka delira ku C.I.L.S.S. na Praia – seti presidenti d’un bês). Es ka konxi Sartana, kabalu nhaku. Es ka konxi biskileta Catita ku IFA tropa. Ti oxi es ka odja timi CCCP (Camaradas Cuidado Com Pele) na Copa

Es kandu es tchiga es atxa Michael Jackson branku kabelu finu. Es ka fulha talku na txon pa da kel pasu di Billie Jean (fladu si nomi e moonwalker) nen es ka imita voz di Bruce Springsteen na We are the World. Es ka insaia Breakdance na caza nen es ka odja Lagoa Azul 10 bês. N ka mesti flou ma nunka es ka atxa Brooke Shields mudjer mas bunita di mundu. Es ka kori pa caza pa ba odja Bel ku Sebastião (corre, corre, Bel... o Bel é tão grande e o Putchi é pequenino...). Es ka sabi pamodi ki oji ten tantu katxor ku nomi di Putchi. Es ka konxi kel boneka panu (Emilia - Sitio do pica pau amarelo) ki ta dada na TeleVisão Experimental de Cabo verde (ti oxi conxedo pa TVEC).

Un lista di sodadi:

Sumu di bigodi, Tang na baion amarelo di olio; Sumol di garafa, Chingua malabar; Fresquinha três kor; Gelados pinguim - ku direito a guarda xuva; Puxada (ki na ora fazi ta kuspida na mon pa ka kema ma era sabi simé); Doneti ku Bolu d’areia di Nha Purkelia; Dropz liláz (supuzitório); Djuga centro; Inter-turma; Karanbola (koks ô amigavel); Monopólio (se passar pela casa partida receba 2000 escudos); Brinka Monzuar (arákua 1, arákua 2, arákua 3 ... altu); Odjada; Polisia ladron; Kanpanada (Podé; 1 10 20...lá vou eu); Saltu au eixu; Anel; Póti; Aizun (as trokolada; as cruzada...); Takada; Ríngi; Bara du lensu (fogu, água); Baratinha; Bonbinha dézton; Kazaku Michael Jackson; Iô-iô; Intervalo 20 minuto na gradi; Relójio sukupira (trabalho manuais na japon); Festa fin di periudo; Video betamax, Sapato sabrina; Rabáti (fúpu, seka pitrólio); Sinkuentinha na OPAD; Novela o Bem-Amado (Dr. Odorico Paraguassu: ...vamos directamente aos finalmente); Jinkana; Loja Nha Cesalta; Bulimundo; Jogos Escolares; Mantenhas pela radio (para Júlia a caminho da América com votos de...); Bala ku Rubon; Tabanka; Filmi di Bruce Lee; Purfumu Lomani; Xupakaka; 1, 2, 3 makakinho du chinês; Prugrama “Olá meninos” (Olá, tu que estas aí...); Ti Ganga, Nhu Lobu ku Xibinhu; Loja Galarias; Rissois di (D. Magui) Liceu; Mota Gery; Rambo I, II e III

Bu sta lenbra di tudu kes kuza li?

Si bu lenbra di metadi, anton nha amigo, dja bu dâ di banda.

Gosi e sô: Na nha tenpu...

“ ...tenpu sábi tenpu di mininu, tenpu sábi tenpu di kriansa... ”

Nu sta bira bedju.

Nha prumero bez

2005-01-27T15:45:00.000-01:00

Seu stába klaru
Lua ta limia kor di oru
Éra la piku, so mi ku el
Ningen mas pa konta storia

Si péli mansu
Si koxa rodonda
Ami so ta kori mon
Ta disliza kosta baxu

Sen sabi mó ki ta fasedu
N djobel korpu interu
So na tuntúnhi
Ti ki N po'l mon ribal petu

Medu toma konta mi
Nha korason bati-m
El na mansu mansu
Ta raganha si pe sugúru

Dja sta! Forti sabi
Des bez k'e bez
Kel águ branku dja skori
Tudu bira fezta

Ti k'enfin tudu kába
Ma kuazi ta saíba mi pa kololu
Foi si nha prumeru bez...
...prumeru bez ki N ordenha un baka

(Traduson y adaptason pa kriolu - Fami Txaskan)

Dia di mudjer krióla

2005-01-21T11:38:00.001-01:00

Pa nhas krióla ki sabi so fazi rióla
Y ki ka ta kume pa bisti fixóla

Pa nhas krióla ki ten korpinho di vióla
Y ta larga studa pa pasia na Corola

Pa nhas krióla tanbi kes k'e kolóla
Ki ta dâ tudu krenti ma ta txiga bóda

Pa nhas krióla y ten monti ti fasóla
Ki tudu dia ta frega ti kria npóla

Pa nhas krióla ki ta txora na mon di Djóka
Y k'e mai, tia y fidju di otu krióla

Pa nhas krióla ki dja kánsa káska sabóla
Ma gosi e teni Palu, Djon ku Póla

Pa nhas krióla tudu, ka so Lóla
K'e rabentóla y ka ta vivi di zimóla

Pa nhas krióla tanbi kes sen skóla
Ki tudu dia e dia di mudjer krióla

Lapidu na bô

2005-01-21T11:37:00.001-01:00

Djo pinta bu saia d'otu kor
Djo muda boton di bu buluza
Bu fasi pe sánbu sima Djulái
Po pasa na mi pa N ka konxeu
Bu fanhi nariz djo troka vóz
Bu pega bu pila bu dedon di pe
Bu trokola odju xuxa kolóla
Bu po xupakáka pe trokado
Ma inda N sta lapidu na bô minina

Djo muda kaminhu pa otu rubera
Na mundu bu st'anda so pa kau rabes
Ta kori di mi djo ba masa bósta
Pilotu mordeu na máma kadera
Bu kre otu algen pa N sai di bu pe
Bu da-m un borduada bára marmuleru
Bu ferga-m nariz na pipi di taréko
Bu da-m kaldu d'asa kafanhotu
Ma inda N kontinua lapido na bô minina

Djo tra kása tedja djo pô beton
Bu poi muzaiku na sala jantar
Bu pô kása fino so pa N skorega
Pa N kai pa N da kokéta na txon
Bu poi nogósio na sukupira
Brajeru ki toma dja subi dja latxi
Bu kunpra Starlet xou di karanbola
Dinheru N ka sabi di pundi ki ben
Ma inda N sta lapido na bô minina

Bu kunpra pasáji bu bai Bissau
Bu ba fase-m kórda ku bu Iran
Bu ba rótxa pretu po ba kontrata ku xuxo
Po da kabu di mi di bez
Kusa ka filábu bu bira dodu
Bu búa na mi bu kore-m mon na koxa
Bu odja ma mi e féro kuradu
Bu pega bu bóka bu pô na di meu
Agô ki N bira lapidu na bô minina

N sta lapidu na bô
Baxu kótxi kótxi minina
Na séti braku bu kabesa
Na tudu pásu ki bu da

(de Orlando Pantera)

Dinheru d'es Mundo

2005-01-21T11:34:00.000-01:00

Gêntis branko di mon na bolsu
N ka inveja nhos rikeza:
S’e pa N kumé intxa-m bariga
Dexa-m djudjun, korpu sinjelo

Riku, riku éra Nhanha Rita
Nhanha Rita di mongolon:
Ma si dinhero di ki sirbil?
E ben lába rostu ku sê kuspinho,
Xágua boka na káska d’obu
Bêbi leti na buli nobu

Ka nhos kuda ma ken k’e riku
Ten seu na tera dentu si mon
Tori altu dja ten ronbadu
Ki fari funko pa ka pega lumi

(de Gabriel Mariano)

Dôs 4dra di kretxeu

2005-01-21T11:30:00.000-01:00

Sima bentu di madrugada
E ben kétu sen txomadu
Txiga ku djetu disimuladu
Nun korpu séku di muláta

Si boka mépu ben kudadu
Sopra dentu’l nha morada
Un kantiga di béntu na pe di kana
Ki poi nha petu bati trez pankada